«Isiltasunaren Musika» izenburupean, bi taldeek Virgen Blanca Kofradiaren laguntzarekin antolatutako hitzorduan parte hartuko dute. Emanaldia hiriko ondare historiko eta musikalarekin lotuta dago, eta aurreko edizioen arrakasta dela eta, bi egunetan banatuko da.
Kontzertuaren une nagusia Iluminatio. Virgen Blanca/Madre del Silencio lanaren estreinaldi absolutua izango da. Tomás San Miguel konpositoreak sortutako obra hau Vitoria-Gasteizi eta Udal Musika Bandari eskainitako omenaldia da.
Egitarauak bi zati izango ditu. Lehenengoan, Udal Musika Bandak Réquiem (David Maslanka) eta In Memoriam (Bert Appermont) interpretatuko ditu. Bigarren zatian, Manuel Iradier Abesbatza batuko zaie Karl Jenkins eta Luis Arambururen piezak jotzeko.
Gonbidapenak irailaren 28tik aurrera eskuratu ahal izango dira. Kofradiako kideek Farolen Museoan (Zapatería kalea, 35) jaso beharko dituzte, eta gainerako herritarrek Musiketxean (San Antonio kalea, 14).
