Taldeak 2016an abiatutako barne hausnarketa prozesuaren ondorioz gauzatu da aldaketa hau. Aurreko armarrian agertzen ziren Oñatiko arranoa eta oreinak mantendu diren arren, lehen planoan zegoen dantzariaren irudia aldatu eta Korpus dantzariarena jarri dute.
Prozesu luze baten emaitza da diseinu berria. Helburu nagusia genero bereizketarik gabeko irudia lortzea eta Oñatirekin duten lotura identitarioa indartzea izan da. Ikur berria jendaurrean ikusgai egon zen udaletxeko fatxadan jarritako oihalean eta taldekideen kamisetetan.
