Gipuzkoako ETE industrialentzako erreferentziazko topagune gisa sendotu den Re-Think Industry kongresuak bere bosgarren edizioa ospatuko du urriaren 21ean, Donostiako Kursaal Jauregian. Ekimen honek industriaren etorkizunari buruz hausnartzeko, esperientziak partekatzeko eta egungo erronkei aurre egiteko bideak ezagutzeko espazio bat eskaintzen du.
Aurtengo edizioak “Lehiakortasuna. Talentua. Berrikuntza.” izango du ardatz nagusi. Gai hauek garrantzi handia dute datozen urteetan industria-sektorearen bilakaeran, enpresen lehiakortasuna indartzeko, talentua kudeatzeko eta erakartzeko, eta berrikuntza aurrerapenerako palanka gisa txertatzeko.
Jardunaldiak Gipuzkoako industria-ekosistemako enpresak, adituak eta eragile nagusiak bilduko ditu. Bertan, industriaren etorkizunari buruzko hausnarketak egingo dira, esperientziak partekatuko dira eta egungo erronkei erantzuten ari diren enpresen jardunbideak ezagutuko dira.
Hasiera gisa, Iván Martén Orkestrako presidenteak inaugurazio-hitzaldia eskainiko du. Ondoren, Isabel Busto ADEGIko presidenteak, Mauricio Arregui Gipuzkoako Ganberako presidenteak, Ander Aizpurua Kutxa Fundazioko zuzendari nagusiak eta Unai Andueza Gipuzkoako Foru Aldundiko Sustapen Ekonomikoko eta Proiektu Estrategikoetako diputatuak Gipuzkoako industriaren etorkizunaz arituko dira.
Jardunaldiaren bigarren zatian, talentua eta berrikuntza teknologikoa izango dira protagonista. Bi mahai-ingurutan, enpresek beren esperientziak eta ikaskuntzak partekatuko dituzte talentua erakartzeko eta kudeatzeko nahiz berrikuntza teknologikoa txertatzeko orduan. Adibide gisa, Alberdi Mekanizatuak (talentua) eta ERLO (Berrikuntza Teknologikoa) enpresek parte hartuko dute Urola Erdiaren kasuan.
Kongresua ixteko, David Hurtado, adimen artifizialean aditu eta Microsofteko berrikuntza arduradunak, hitzaldi bat emango du adimen artifizialari buruz.
Iraurgi Berritzenetik azpimarratzen dute Re-Think Industry bezalako ekimenek eskualdeko industria-enpresei aukera paregabea ematen dietela joera berriak ezagutzeko, beste enpresa batzuen esperientzietatik ikasteko, ezagutza partekatzeko eta industria-ekosistemako beste eragileekin harremanak sortzeko.
Horregatik, Iraurgi Berritzenek eskualdeko industria-enpresak kongresuan parte hartzera animatzen ditu, industriaren etorkizuneko erronkei buruzko ikuspegi eta esperientzia berriak eskuratzeko.
