Gora Beasain ekimenak, euskara, auzolana eta feminismoa oinarri hartuta, herritarrak gonbidatu ditu Loinatz jaietako afari herrikoien antolaketan parte hartzera. Deialdia festetako bigarren asteburuko ostiral eta larunbatean plaza azpian egingo diren afarietarako da.

Iaz, ekimenak arrakasta handia izan zuen, 700 lagun baino gehiago bildu baitziren afarietan, 40 boluntarioren auzolanari esker. Aurten ere, antolatzaileek herritarren laguntza behar dute hainbat lanetan, hala nola txandak egiteko, desmuntatze lanetan edo aurreko prestaketetan.

Auzolanean parte hartzeko interesa dutenek izena eman dezakete horretarako prestatu den online formularioaren bidez. Ekimen honek komunitatearen inplikazioa bilatzen du, Beasaingo jaiak herritar guztien artean eraikitzeko.