Bergarako Udaleko Euskara Zerbitzuak hiru dirulaguntza mota emango ditu 2025-2026 ikasturtean edota 2026ko udan euskara ikasteko edota ikasketa osagarriak euskaraz egin dituztenentzako. Laguntzak hiru esparrutan banatuko dira.
Lehenengoa, Bergarako Udal Euskaltegitik kanpo euskara ikasten duten bergararrentzako da. Hau da, beste euskaltegi batean edo barnetegian ikasten dutenentzako laguntza, bertako euskaltegian ikasten dutenentzako laguntzak bertatik ematen baitira.
Bigarrenik, Udako Euskal Unibertsitateak (UEUk) antolatutako ikastaroetan parte hartu duten bergararrentzako dirulaguntza jasoko dute. Hirugarrenik, UNEDeko Idazle Eskolak antolatzen dituen modulu eta hitzaldietan parte hartu duten bergararrentzako laguntza ere badago.
Dirulaguntzen eskariak 2026ko urriaren 25a baino lehen aurkeztu behar dira Bergarako udaletxeko Erregistro Orokorrean (BAZ). Epea 2025-2026 ikasturtean edota 2026ko udan egindako ikastaroetarako da.
Dirulaguntza hauen inguruko informazio gehiago eskuratu nahi izanez gero, Bergarako Udaleko Euskara Zerbitzuan (e-posta: euskara@bergara.eus) edo Bergarako Udalaren webgunean ([https://www.bergara.eus/eu/node/22068](https://www.bergara.eus/eu/node/22068)) kontsulta daiteke. Idazle Eskolak antolatutako ikastaroen inguruko informazioa, berriz, bere webgunean aurki daiteke.
