Udalak jakinarazi duenez, U6 lineak geraleku berria izango du Jose Maria Usandizaga kaleko 2. zenbakian, eta horrek ibilbidearen aldaketa ekarriko du. San Markos kaleko 15. zenbakiko geralekua kendu egingo da, baina U5 lineak zerbitzua ematen jarraituko du bertan.
Bestalde, Xenpelar kalea, hirigunea, Agustinak eta Zamalbide lotzen dituen U33 autobus linearen maiztasunak handituko dira. Goizean 10:10ean eta 12:10ean, eta arratsaldean 16:10ean eta 18:10ean egingo dira lau bidaia gehigarri.
Gaztañoko egoerara egokituz, Bidez Bide zerbitzuak ordezkatuko du aurrerantzean U34 lineak eskaintzen zuen zerbitzua auzo horretan. Zerbitzu hau pertsonalizatuagoa da eta adinekoei zein mugikortasun murriztua duten pertsonei zuzenduta dago, landa eremuan eskaintzen denaren antzera.
Udalak gogorarazi du hobekuntza hauek auzo batzarretan jasotako herritarren ekarpenei erantzuteko egin direla, zerbitzua errazteko eta optimizatzeko helburuarekin. Gainera, aurretik egindako beste neurri batzuk ere aipatu ditu, hala nola tarifa murrizketak eta larunbatero eskaintzen den gaueko zerbitzua.
