Arrasate Herri Eskolako Bedoñabe eraikineko kanpoaldea guztiz aldatu da. Aspaldiko asfaltozko zoru gogorraren ordez, gune berde eta naturalizatu bat sortu dute, ikasleen sormena eta jarduera fisikoa sustatzeko helburuarekin. Proiektuak Erguin eta San Andrés ikastetxeetan egindakoen ildotik jarraitzen du, udalaren apustu estrategikoa baita eskola-patioak ingurune pedagogiko bihurtzea.
Eremu berriak hiru gune nagusi ditu. Mugimendurako gunean, 'Mari-ren basoa' izenekoan, txirrista, eskalada-rampa, oreka-jokoak eta rokodromoa instalatu dituzte. Bigarren gune batean, sormena lantzeko elementuak jarri dituzte, hala nola tipi bat, eszenatoki txiki bat eta baratze bat. Azkenik, biodibertsitatea sustatzeko, intsektuen hotela eta hegaztientzako habia-kutxak jarri dituzte.
Eraldaketa horretarako, K1 Ekopaisaia enpresak egindako lanetan materialak berrerabili dituzte, eraispen-hondakinak erabiliz patioan altuerak eta erliebeak sortzeko. Gainera, haritzak, arteak eta gereziondoak landatu dituzte, itzala emateko eta biodibertsitatea handitzeko.
