Asteazken honetan, giro ezin hobean, Malen jaietako egun handia ospatzen ari dira Mutrikuko herritarrak. Eguraldiak lagunduta, egitaraua Mutrikuko Musika Bandaren diana batekin hasi zen, eta ondoren Meza Nagusia, haur parkea eta herriko bandaren emanaldia bezalako ekitaldiak izan dira. Arratsaldean sokamuturra eta herri kirolen jaialdia iragarrita zeuden, eta gauean su artifizialak, dantzaldiak eta kontzertuak izango dira.
Ostegunean, berriz, umeak izango dira Malen Txiki Egunaren protagonistak. Egitaraua umeen marrazki lehiaketarekin hasiko da 10:00etan. Ondoren, erraldoi eta buruhandiak (12:00etan), Txikien Madalen txapelketako finalak Miruaitz frontoian (17:00etan), 'Modernoak' ikuskizuna Zabiel plazan (17:00etan), Hogar del Marinero elkarteak antolatzen duen haurren danborrada (20:00etan) eta Esna gazte! diskofesta (21:30ean) izango dira.
Osteguna gazte eta helduentzako atseden egun aproposa izango bada ere, jaiak ez dira amaituko. Ostiralean Kuadrilla Eguna ospatuko da herrian, eta larunbatean, aurtengo 'madalenak' borobilduko dituen Santixo Eguna izango da.
