Azkenaldian ohikoa den bezala, atzo ere etenaldiak eta atzerapenak izan ziren Renfeko C3 linean. Aiaraldea, Bilbo eta Hego Uribe eskualdeak lotzen dituen zerbitzuak hainbat trenen etenaldia eta bertan behera uztea jasan zituen. Gainera, Ollargan eta Abando arteko tartea funtzionamenduz kanpo egon zen arratsaldeko ordu batzuetan, eta zenbait geltokitatako pantailak ere kaltetuta agertu ziren.
Egoera salatzeko, EH Bilduk ohar bat zabaldu du, non adierazi duen C3 linearen egoera larria dela. Taldeak azpimarratu du atzoko gertakaria ez dela isolatutzat jo behar, baizik eta lineak "aspaldidanik dituen egiturazko arazoen beste adibide" bat dela.
“"Oinarrizko zerbitzu publikoa da eta onartezina da herritarren mugikortasunari eta bizi-kalitateari zuzenean eragiten dieten gorabeherak errepikatzen jarraitzea."
Aurreko astean, Laudioko eta Arrigorriagako alkateek agerraldi bat egin zuten zerbitzu "moderno, seguru, irisgarri eta duina" eskatzeko, eta hobekuntza zehatzak plazaratu zituzten. Orain, Renferi eta Adifi erantzukizuna beren gain hartzeko eta modu koordinatuan jarduteko eskatu diete.
Taldeak iragarri du ekimen instituzionalak sustatuko dituztela Batzar Nagusietan, Eusko Legebiltzarrean eta Diputatuen Kongresuan, baita gizarte-mobilizaziorako dinamikak ere abian jarriko dituztela.
