Turismo sektoreko eragile eta langileei zuzendutako doako lau prestakuntza saio egingo dira urriaren eta azaroaren bitartean. Saio guztiak Tolosako Lehiberri Zentroan izango dira, asteazkenetan, 16:00etan hasita.
Prestakuntza programa hau Gipuzkoako Foru Aldundiaren Talentur ekimenaren barruan kokatzen da. Helburua da turismo sektoreko profesionalen gaitasunak indartzea eta horiek eraldaketa digital eta sozialera egokitzeko baliabideak eskaintzea.
Zikloak lau arlo nagusi jorratuko ditu: oinarrizko euskara ikastaroa turismo-arreta emateko, adimen artifizialean oinarritutako negozioen posizionamendua, zereginen automatizazioa IAren laguntzarekin, eta zerbitzu eta esperientzia inklusiboen diseinua.
Interesdunek Tolosaldea Garatzeneko Turismo Sailarekin jarri behar dute harremanetan izena emateko edo informazio gehiago jasotzeko. Harremanetarako telefonoa 606 758 577 da eta helbide elektronikoa garmendia@tolosaldea.eus.
Lehenengo ikastaroa, 'Oinarrizko euskara turismo-arreta emateko', urriaren 7, 14, 21, 28 eta azaroaren 4an izango da, 10 orduko iraupenarekin. Cebank-ek emango du eta bezeroei euskarazko harrera eta arreta emateko gakoak landuko ditu.
Ondoren, azaroaren 11n, 'AA posizionamendua (AEO): Adimen Artifizialaren aroko SEO berria' saioa izango da, Digixop-ek emana (gaztelaniaz). Bertan, IAren bidez negozioak bilaketa sistemetan nola posizionatu ikasiko da.
Azaroaren 18an, baita ere Digixop-ek gidatuta, 'Zereginen automatizazioa IAren laguntzarekin' landuko da. Eguneroko lanak eta prozesuak automatizatzeko eta optimizatzeko moduak erakutsiko dira.
Azkenik, azaroaren 25ean, Bask For All-ek (gaztelaniaz) 'Zerbitzu eta esperientzia inklusiboen diseinua' tailerra eskainiko du. Pertsona guztiei zuzendutako zerbitzu turistiko irisgarriak eta inklusiboak diseinatzeko estrategiak aztertuko dira.
