Sistema honek, adimen artifizialean oinarrituta, hiriko turismoaren ikuspegi osoa eskainiko du. Horrela, ostatuen eskaintza eta eskaria, bisitarien profila eta portaera, turismoaren ekarpena ekonomiari eta enpleguari, aireko konexioak eta kongresu jarduera bezalako alderdiak ezagutuko dira. Helburua hiriko turismo jasangarriaren kudeaketan aurrera egitea da.
TAS-ak hainbat iturri ofizial eta espezializatuetatik jasotzen du informazioa, hala nola Estatistika Institutu Nazionala (INE), Eustat, Basquetour, Dataestur (SEGITTUR), Gizarte Segurantza eta Euskadiko Enpresa eta Jarduera Turistikoen Erregistroa (REATE).
Plataformak atari publiko bat eta udalaren barne erabilerarako analisi ingurune bat uztartzen ditu. Atari publikoak informazio eguneratua eta eskuragarria jartzen du herritarren, enpresen eta sektoreko eragileen esku, eta barneko inguruneak informazio osagarria eskaintzen du kudeaketa eta plangintza turistikoa laguntzeko.
Sistema hau dinamikoa da, eta informazio iturri berriak eta adierazle zein funtzionalitate berriak pixkanaka txertatzeko diseinatu da, Vitoria-Gasteizko turismo jarduerari buruzko ezagutza zabaltzeko eta informazio behar berriei erantzuteko.
Proiektu honetan parte hartu dute Ekonomia Sustapeneko, Enpleguko, Merkataritzako eta Turismoko udal sailak, Administrazioaren Modernizazioko udal sailak eta Datuen Udal Bulegoak, eta Basquetourren laguntza ere izan da. TAS-a Europar Batasunaren Next Generation funtsekin finantzatutako Berreskuratze, Eraldatze eta Erresilientzia Planaren barruan kokatzen da, Espainiako Gobernuak kudeatuta, eta Helmuga Jasangarriaren Planaren (PSTD2) bigarren fasearen parte da.
