Irailean hasitako obrak aurrera doaz Andra Mari inguruan, eta gaur egun azpiegitura lanetan ari dira. Helburu nagusia inguruko uholdeak saihestea da, horretarako euri-uren sarea egokitzen eta ponpaketa-sistema prestatzen ari dira. Gainera, Kaia kale inguruko hoditeria egokitzeko lanak ere egiten ari dira.
Lan hauen ondorioz, gaurtik aurrera Kaia kaleko 3-5 zenbakien arteko tartea itxita egongo da obraren fase hau amaitu arte, segurtasuna bermatzeko. Tarte horretan, bertako bizilagunek eta erabiltzaileek soilik izango dute igarotzeko aukera. Datozen asteetan, berriz, kiroldegiko sarreraren inguruan jarraituko dute lanean, hoditeria berria instalatzeko.
Obrek irauten duten bitartean, eraikinetako sarrera-irteerak bermatuta egongo dira une oro, nahiz eta, lanen arabera, zenbaitetan ordezko bideak erabili beharko diren. Udalak obraren bilakaerari eta izan daitezkeen aldaketei buruzko informazioa eguneratzen jarraituko du, eta herritarrei eskatzen die obrako seinaleak eta itxiturak errespetatzeko.
Udalak barkamena eskatu du obrek eta aldaketek sor ditzaketen eragozpenengatik, eta eskerrak eman dizkie herritarrei beren ulermenagatik.
