Getariako Udalak Lehentasunezko Jarduketaren Oinarrizko Proiektua onartu du, urteetan garatu gabe egon den Potzuaga-Gaina eremuaren aktibazioa eta bizkortzea helburu duena. Prozesu honek 200 etxebizitza inguru eraikitzea aurreikusten du, eta horietatik %75 babes publikokoak izango dira.
Potzuaga-Gaina 2008ko Arau Subsidiarioetan bizitegi-eremu gisa aurreikusita zegoen. Azken urteetan, Udalak eremuaren garapena bideratzeko hainbat urrats egin ditu, eta 2026an behin betiko onartu zen haren antolamendua eguneratu zuen Arau Subsidiarioen Modifikazio Puntuala. Orain, Lehentasunezko Jarduketaren prozedurak, administrazioak berak prozesuaren ekimena har dezan aukera ematen dion tresnak, izapidetze arinagoa ahalbidetuko du eta garapena gauzatzeko beste urrats garrantzitsu bat suposatzen du.
Onartutako proiektuak 200 etxebizitza inguru aurreikusten ditu: 110 etxebizitza sozial babestuak, 40 tasatuak eta 50 libreak. Horrela, bizitegi-eraikigarritasunaren %75 babes publikoko etxebizitzetara bideratuko da, Getariako etxebizitza babestuaren eskariari erantzuteko. 2026ko urtarrileko datuen arabera, 247 eskaera daude Getariarekin lotuta etxebizitza babestua eskuratzeko, horietatik 135 bertan erroldatutako herritarrenak.
Udalak lur-jabeekin elkarlanean jarraituko du prozesuaren hurrengo urratsak lantzeko. Proiektuari ekarpenak egiteko 20 eguneko epea egongo da, GAOan argitaratzen denetik aurrera.
