Euskal Kostaldeko Geoparkeak UNESCOren Munduko Geoparke izendapenari eutsi dio, laugarren aldiz, erakundeak Txartel Berdea eskuratu ondoren. Nazioarteko erakundeak gaur jakinarazi du erabakia, Parisen egiten ari den UNESCOren Munduko Geoparkeen Kontseiluaren 11. bilkuran. Geoparkeak kalifikaziorik altuenarekin gainditu du azterketa, eta 'Green Card' delakoa eskuratu du ikerketa zientifikoan, kontserbazioan, hezkuntzan eta natura-turismoan egindako lanagatik. Adituek Geoparkea "sendo eta osasuntsu" gisa definitu dute.
Hau laugarren aldia da Euskal Kostaldeko Geoparkeak Munduko Sarean jarraitzeko babesa beste lau urterako berritzea lortzen duela. Oraingo honetan ere, adituek ez dute inolako neurri zuzentzailerik identifikatu. Leire Barriuso, Geoparkeko kudeatzaileak, adierazi duenez, "berrespen honek berme bat ematen dio Geoparkeari. Hainbeste urte eta gero, geoparke sendo bat bihurtu garela jasotzen du UNESCOko ebaluatzaileen txostenak; bertako agenteen inplikazioa eta gure estrategia errealista bezain asmo handikoa goraipatzen dituzte".
“"Laugarren berrespena izateak ez dio garrantzirik kentzen; aitorpen horren atzean lorpen hori ahalbidetu duten pertsona, erakunde, enpresa eta erakunde askoren lan eskerga dago."
Debako, Mutrikuko eta Zumaiako Udalek, Geoparkea osatzen duten hiru udalerriek, pozik hartu dute albistea. Mutrikuko alkate eta Geoparkeko presidente Ainhize Azpiazuk adierazi duenez, "laugarren berrespena izateak ez dio garrantzirik kentzen; aitorpen horren atzean lorpen hori ahalbidetu duten pertsona, erakunde, enpresa eta erakunde askoren lan eskerga dago". Debako alkate Alazne Txurrukak "Errekonozimendu honek gure lurraldea babesteko eta bere garapena sustatzeko lanean jarraitzera animatzen gaitu" azpimarratu du. Zumaiako alkate Iñaki Ostolazak, izendapenaren harira zera esan du: "UNESCOren aitorpenak gure ikuspegia berresten du eta Geoparkearentzat etorkizun bikaina lortzeko daukagun itxaropena berritzen laguntzen digu".
“"Zorionak eta eskerrik asko ibilbide luze honetan Geoparkearen ondoan egon diren guztiei (herritarrak, elkarteak, enpresak, udaletako ordezkariak, alkateak..) denon artean lortu baitugu ebaluazio hau gainditzea. Guztion lanaren emaitza izan da eta bultzada ematen digu beste hainbat urtetan lanean jarraitzeko."
Leire Barriusok Euskal Kostaldeko Geoparkeko bidelagun guztiak zoriondu eta euren ezinbesteko kolaborazioa eskertu du. "Zorionak eta eskerrik asko ibilbide luze honetan Geoparkearen ondoan egon diren guztiei (herritarrak, elkarteak, enpresak, udaletako ordezkariak, alkateak..) denon artean lortu baitugu ebaluazio hau gainditzea. Guztion lanaren emaitza izan da eta bultzada ematen digu beste hainbat urtetan lanean jarraitzeko", adierazi du Euskal Kostaldeko Geoparkeko kudeatzaileak.
