Txapelketak hamar herri bilduko ditu larruzko paleta eta pala motzeko modalitateetan. Final zortzirenetan lehiatuko diren lau herriak Azpeitia, Olaberria, Zumaia eta Oiartzun dira. Gainerako sei herriak, Ordizia, Andoain, Donostia, Lazkao, Deba eta Errenteria, final-laurdenetan batuko dira lehiara.

Azpeitia ko taldea osatuko duten palistak Oier Alkorta, Eneko Martija, Telmo Garaizar, Mikel Santxez, Urritz Goenaga eta Mikel Gurrutxaga izango dira. Antolatzaile lanak Asier Egiguren Bikutzek egingo ditu. Joaneko partida larunbatean jokatuko dute, goizeko 10:00etan, etxetik kanpo.

Eskuzko modalitateari dagokionez, 24 herrik eman dute izena. Txapelketa hasita badago ere, Azpeitia maiatzeko hirugarren asteburuan batuko da lehiara, final zortzirenetan. Aurkaria Amezketa eta Lazkao ren arteko kanporaketaren irabazlea izango da. Joaneko partida etxetik kanpo jokatuko dute.

Final hamaseirenetako joaneko partidan, Amezketak 2-1 irabazi zion Lazkaori, 12-22, 22-6 eta 22-16ko emaitzekin. Datorren asteburuan erabakiko da Azpeitia ren aurkaria eskuzko final zortzirenetan.