Astelehenean hasiko da Egunean Behin jokoaren 21. denboraldia, eta berrikuntza garrantzitsu bat dakar: euskarazko tokiko hedabideen arteko lehia. Tokikom, 69 komunikabidek osatutako sarea, denboraldi honetako babesle nagusia izango da, eta horren harira, Tokikom Liga izeneko txapelketa bat antolatu da.

Denboraldi berria astelehenean hasi eta uztailaren 12an amaituko da. Lehia honetan, hedabide bakoitzak talde bat osatuko du, eta talde horietako parte-hartzaileek egunero hamar galdera erantzun beharko dituzte ohiko dinamikari jarraituz. Astez aste, talde bakoitzeko kideen puntuak batuko dira, eta horrela osatuko da hedabideen arteko sailkapena.

Hamar hedabidek hartuko dute parte Tokikom Liga honetan: 28 Kanala, Aiurri, Anboto, Arabako Alea, Barrena, GiTB, Goiena, Guaixe, Hiruka eta Guka. Gukak astelehenero jakinaraziko du ligaren sailkapenaren egoera.

Guka-Urola Kosta taldean parte hartzen dutenek sariak irabazteko aukera izango dute. Astero, Gukaren produktuak eta hedabide horren harpidetza digitala zozkatuko dira. Gainera, bederatzi aste igaro ondoren, Guka-Urola Kosta taldeko sailkapenaren buruan dagoen herritarrak bi lagunentzako otordua irabaziko du Getariako Elkano jatetxean. Gukak sei webgunetan argitaratuko ditu asteko saridunen izenak, eta denboraldiko irabazlea uztailaren 13an jakinaraziko du.