Azpeitiko Udala, Ederto-Harakel, Bertan eta Dendartean elkarteek elkarlanean antolatu dute ekitaldia. Hanburgesa zaleek egun handi bat izango dute jaki berezi honi eskainia, eta herriko tabernak eta jatetxeak bilduko dira, baita Gipuzkoa osoko harategiak ere, tokiko eskaintza gastronomikoa indartzeko eta establezimenduen lana ikusarazteko.
Antolatzaileek izena emateko epea ireki dute dagoeneko. Bertako tabernek eta jatetxeek “Azpeitiko Hanburgesa Onena” lehiaketan parte hartu ahal izango dute, eta Gipuzkoa osoko harategiek, berriz, “Artisau Hanburgesa Onena” saria lortzeko lehiatuko dira.
Azpeitiko Merkatu plaza izango da ekitaldiaren gune nagusia. Bertaratzen direnek tokiko harategietako osagaiekin egindako hanburgesak dastatu ahal izango dituzte, kalitatezko produktua eta hornitzaileen gertutasuna balioetsiz. Hanburgesez gain, Izarraitz Igeri Elkartea igeriketa klubaren eskutik edari eskaintza ere egongo da. Jai giroa osatzeko, 80ko hamarkadako musika izango da protagonista, Djsergi_AP-ren zuzeneko saioarekin. Egun horretan bertan banatuko dira “Hanburgesa Festa” lehiaketetako sariak.
Ostalaritzako establezimenduek aukera paregabea izango dute beren proposamen gastronomikoak ezagutzera emateko eta bezero berriak erakartzeko. Parte hartu nahi duten tabernek edo jatetxeek gehienez 20 euroko prezioa izango duten proposamenak aurkeztu beharko dituzte. Hanburgesa hauek maiatzaren 18tik 22ra bitartean egon beharko dute publikoaren eskura, eta gutxienez ekainaren 21era arte mantendu beharko dira kartan. Izena emateko epea maiatzaren 14an amaituko da.
Izen-emateak egiteko, “Azpeitiko Hanburgesa Onena” lehiaketarako Bertan elkartearen bidez egin daiteke, 943 025 673 telefono zenbakira deituz edo WhatsApp bidez idatziz, edo bertan.azpeitia@gmail.com helbidera mezu elektroniko bat bidaliz. Gipuzkoako hanburgesa haragiaren lehiaketarako, berriz, Ederto-Harakel elkartearen bidez egin daiteke, 943 86 53 52 / 671 64 34 88 telefono zenbakietara deituz edo ederto@ederto.com helbidera mezu elektroniko bat bidaliz.
