Negozio propioa martxan jartzeko ideia duten eta proiektua bideragarria den aztertu nahi duten pertsonei zuzenduta dago programa hau. Hautatutako ekintzaileek 2.000 euroko dirulaguntza jasoko dute beren negozio ideia lantzeko. Zenbateko hori %15 handituko da 30 urtetik beherakoen kasuan, eta beste %15 emakumeen kasuan.
Laguntza ekonomikoaz gain, ekintzaileek beren ideia aztertzeko, garatzeko eta negozio bideragarri bihurtzeko beharrezko tresnak eta aholkularitza jasoko dituzte. Azaroaren 12ra artean egin daitezke eskaerak. Prozesuan, parte hartzaileek banakako tutoretza saioak izango dituzte, hiru eta bost hilabete arteko epean, negozio ideia landu, haren bideragarritasuna aztertu eta jarduera ekonomikoa martxan jartzeko urratsak prestatzeko.
Programa Azkoitia, Azpeitia, Aizarnazabal, Beizama, Errezil eta Zestoa ko ekintzaileei zuzenduta dago. Baldintza nagusiak dira 18 urtetik gora izatea, langabezian eta enplegu eskatzaile gisa izena emanda egotea, negozio ideia bat edukitzea eta aurreko urtean jarduera ekonomiko propioan alta emanda egon ez izana. Lanaldia %30etik gorakoa ez duten pertsonek ere parte hartu ahal izango dute, gainerako baldintzak betez gero. Parte-hartzaileek beren proiektua garatzeko konpromisoa hartu beharko dute, eta tutoretza-prozesua amaitu ondoren, gehienez hiru hilabeteko epean, jarduera ekonomikoari alta eman beharko diote.
Zortzi ekintzailerentzat aurreikusten da laguntza hau. Interesatuek azaroaren 12a baino lehen aurkeztu beharko dute eskaera, Azpeitiko Udalaren bitartez. Informazio gehiago nahi izanez gero, Iraurgi Berritzenekin harremanetan jarri daiteke (688718777, Alazne Larrañaga) edo Azpeitiko Udalarekin (HAZ).
