Sindikatuaren arabera, Correosek Bizkaia osorako 25 kontratu inguru baino ez ditu aurreikusi uda honetarako. Kontratu horiek, gainera, posta-banaketan ez ezik, bulegoetan eta zentro logistikoetan sortutako hutsuneak betetzeko ere balioko lukete, eta horietako erdiek hilabeteko iraupena izango lukete.
CCOOk adierazi du kopuru hori ez dela nahikoa udako beharrei erantzuteko. Sindikatuak azaldu duenez, oporretan dauden langileak behar bezala ordezkatzen ez badira, lanean jarraitzen dutenek lan-karga handiagoa hartu behar izaten dute. Horrek, haien esanetan, ez du eraginik langileen egunerokoan soilik, baita herritarrek jasotzen duten zerbitzuan ere.
Urduliz, langile faltaren ondorioz kaltetutako herrien artean dagoela nabarmendu du CCOOek. Sindikatuaren arabera, bertan ez dago bermatuta eguneroko posta-banaketa, eta egoera hori hainbat udalek ere salatu dutela gaineratu du.
Correosek Bizkaian mila langile inguru dituela gogorarazi du CCOOek, eta udarako egindako plangintza gogor kritikatu du. Sindikatuaren iritziz, langile faltak lan-baldintza prekarioak, ez-seguruak eta osasungaitzak sortzen ditu, eta, aldi berean, zerbitzu publikoaren kalitatea okertzen du.
CCOOk dio egoera ez dela ustekabekoa izan, eta oporraldia hasi aurretik egindako kontratazio-batzordean ohartarazi zuela aurreikusitako ordezkapenak ez zirela nahikoak izango. Uda erdira iritsita, sindikatuak berretsi du langile faltaren ondorioak agerian daudela, bai beharginen lan-kargan, bai hainbat herritan eskaintzen den posta-zerbitzuan.
