Aurtengo deialdia ohikoa baino lehenago iritsi da, laguntzen tramitazioa arintzeko helburuarekin. Guztira, Tolosako Udalak 900.000 euro inguru banatuko ditu lehia bidezko eta lehiarik gabeko 21 dirulaguntza-lerrotan, nahiz eta zenbait kasutan kopuru handiagoak ere banatu ahal izango diren.

Laguntza hauek hainbat arlo garrantzitsu hartzen dituzte, hala nola etxebizitza, hirigintza, gizarte-zerbitzuak, euskara, kultura, gazteria, berdintasuna, kirola, merkataritza eta garapen ekonomikoa. Lerro bakoitzaren xehetasunak eta oinarriak udalaren webgunean kontsulta daitezke.

Deialdi honetaz gain, udalak laguntza izendunak ere bideratuko ditu, hau da, elkarteei zuzenean esleitzen zaizkienak. Bestalde, inauteriei edo hezkuntzari lotutako beste dirulaguntza batzuk urteko beste sasoi batzuetan argitaratzen dira.

Deialdian aldaketa nabarmen batzuk egin dira iazkoarekin alderatuta. Etxebizitza arloan, alokairua ordaintzeko eta etxebizitza hutsak birgaitzeko laguntzetara bideratutako aurrekontua 58.800 eurotik 90.000 eurora igo da. Eskaerak egiteko epea ere aldatu da, ekainaren erditik uztailaren erdira bitartean egin ahal izango direlarik, lehen abuztuan izan beharrean.

Hirigintza arloan, laguntzak udalerri osora zabaldu dira, landa-inguruneko bizilagunek ere etxebizitzak birgaitzeko eskaerak egin ahal izateko. Gizarte-zerbitzuei dagokienez, 15.000 euro gehiago bideratu dira arlo horretan lan egiten duten irabazi-asmorik gabeko elkarteetara. Merkataritza arloan, negozio berriak sustatzeko (Ekin) eta negozioak eskualdatzeko (Berriz) laguntzen poltsak handitzeko aukera ezarri da.

Dirulaguntza-lerro gehienetan eskaerak egiteko epea zabalik dago jada. Eskaerak online egin daitezke, udalaren egoitza elektronikoan, edo presentzialki UDATEn, herritarren arreta-zerbitzuan. Eskaerak egiteko azken egunak aldakorrak dira laguntza bakoitzaren arabera, baina eperik laburrena 20 egun naturalekoa da, beraz, apirilaren 30a baino lehen egin beharko dira izapideak zenbait kasutan.