Lanek bi hilabeteko iraupena izango dute, eta horien bidez, galtzada berritzeaz gain, udaletxearen aurreko errepidea eta espaloiak maila berean jarriko dira, oinezkoen irisgarritasuna nabarmen hobetuz. Horrez gain, Foru Aldundiak adierazi duenez, oinezkoentzako pasabide seguruagoak sortuko dira, batez ere elizaren eta kale nagusiarekiko bidegurutzetik hurbil dagoen ostatuaren arteko tartean.
Proiektu honen barruan, 30 kilometro orduko abiadura-muga ezarriko da zeharbideko tartean, zirkulazioak hiri-ingurunean duen eragina murrizteko. Bide hori hirigunean integratuta, oinezkoen segurtasuna bermatzea da helburua.
“"Lan hauek Foru Aldundiaren estrategiaren parte dira, zeharbideen segurtasuna eta herriguneetan duten integrazioa hobetzeko, eta horretarako 2026 eta 2027 urteetarako lurralde osoan 7 milioi eurotik gorako inbertsioa egingo da."
Ildo horretan, Tolosaldeko beste herri batzuetan ere antzeko jarduerak egiten ari direla nabarmendu du Aldundiak. Berrobin, trafikoa baretzeko eta segurtasuna hobetzeko esku-hartzeak egin dira; Villabona-Amasan, berriz, N-I errepideko lotunean oinezkoentzako lotura berriaren lehenengo fasea bukatzear dago. Gainera, GI-3751 errepidearen eta Amasaren arteko errepidea zabaldu eta espaloia eraikitzeko proiektuaren bigarren fasea lizitaziora aterako da ekainean. Tolosako Amarotzen ere, N-I azpian bidegorria eta espaloia eraikiko dira, eta lan horiek ere ekainean aterako dira lizitaziora.
