Bizkaiko diputatu nagusiak, Bizkaiko Garraio Partzuergoko presidente gisa, Metro Bilbao ri eskatu dio bere araudia aldatzeko, zortzi kilotik gorako txakurrek metroan bidaiatu ahal izateko. Gaur egun, zortzi kiloko muga dago maskotak garraio publikoan sartzeko. Diputatu nagusiaren ustez, gaiaren inguruko eztabaida gaindituta dago, eta orain baldintzak ezartzera bideratu behar da, hala nola, bagoi batzuetan soilik edo muturrekoarekin bidaiatzea.

Iaz, maskoten jabeek kanpaina bat hasi zuten, change.org plataforman 8.000 atxikimendu inguru jaso zituena, tamaina handiagoko txakurrek metroko 1. eta 2. lineetan sartu ahal izateko. Linea horietan Estatuko araudi murriztaileenetako bat dago indarrean. Aldiz, Euskotren ek kudeatzen duen 3. linean, Renfe ko Aldirietako trenetan, eta Lisboa, Porto, Brusela, Viena, Paris, Berlin edo Erroma bezalako hirietako metroetan, txakur handiak sartzea baimenduta dago.

Horregatik, Metro Bilbao ri proposatu dio egungo araudia aldatzea, maskota horiek metroan sartzeko baimena izan dezaten. Adierazi duenez, “garrantzitsuena da mundu guztiaren eskubideak bateragarri egingo dituzten arauak zehaztea”.

Bestalde, diputatu nagusiak aurreratu du udararen aurretik metroko bagoi eta seinaleztapen berrien lizitazioa egin ahal izatea espero duela. Proiektu honek 800 milioi euro inguruko inbertsioa ekarriko du, “Bizkaian datozen urteetan egingo den inbertsio publiko garrantzitsuena” izango delarik, garraio publikoak herritarren mugikortasunean duen garrantzia dela eta.

Gaur egun, 1. eta 2. lineetan dabiltzan 46 konboiek osatzen dute flota; horietako erdiak metroa estreinatu zenetik daude martxan, eta bakoitzak hiru milioi kilometro egin ditu. Gainerakoak 2001etik zerbitzuan dauden 14 unitate dira, 2,5 milioi kilometrorekin, eta 2009tik zirkulatzen duten azken bederatziak, 1,5 milioi kilometrorekin. Unitate eta seinaleztapen sistema “belaunaldi berri” hori sartzeak konboien edukiera handitzea ahalbidetuko du, bost bagoikoak izango baitira guztiak, eta maiztasun handiagoa eskainiko du.