Bi hamarkada baino gehiagoko ibilbidearekin, lehiaketa hau bi herrietako Gabonetako ohiko hitzordu bihurtu da. Ekimenak merkatariek Gabonetan beren establezimenduak erakargarriago egiteko erakusten duten sormena, ardura eta ahalegina aitortzen du. Bi udalen arteko lankidetza eta hurbileko merkataritzaren aldeko konpromiso partekatua islatzen ditu.
Rosa Maiza Zumarragako Udaleko Sustapen Ekonomikoko zinegotziak nabarmendu duenez, tokiko merkataritza saltoki hutsak baino askoz gehiago da: kaleei bizia ematen die, jarduera ekonomikoa eta enplegua sortzen du, eta gertutasunean zein arreta pertsonalizatuan oinarritutako zerbitzua eskaintzen du. Lehiaketaren helburua ez da soilik erakusleihoen edertasuna saritzea, baizik eta merkatariek herrien eguneroko bizitzari egiten dioten ekarpena aitortzea eta herritarrak bertako establezimenduetan erostera animatzea.
Lehiaketak bi herrientzako izaera bateratua mantenduko du, eta Urretxuko zein Zumarragako merkataritza-establezimendu guztiek parte hartu ahal izango dute. Izena emateko epea azaroaren 13tik 27ra egongo da zabalik. Aurten, erakusleihoak ikusgai egoteko epea luzatu da, azaroaren 27tik abenduaren 17ra arte, Gabonetako giroa sortzen laguntzeko.
Aurtengo edizioak berrikuntzak dakartza sarietan ere. Aurten, herriko dendetan erabiltzeko erosketa-bonuen aldeko apustua egin da. Hiru sari nagusi izango dira, 300, 200 eta 100 euroko bonuekin, hurrenez hurren. Horiez gain, Herritarren Saria ere izango da, 100 euroko bonuarekin, BI-TARTEAN merkatarien elkarteak kudeatuko duena. Botoa ematen duten pertsona guztien artean, elkarteko establezimenduetan erabiltzeko 100 euroko bonu bat zozkatuko da.
Sari-banaketa abenduaren 17an, osteguna, 20:15etik aurrera, Urretxuko udaletxeko Portaloian egingo da. Ekitaldi honetan jakinaraziko dira irabazleen izenak eta mokadu txiki bat eskainiko da.
Antolatzaileek merkatariei eskertu diete urte osoan egiten duten lana eta Gabonetan erakusleihoak apaintzeko eskaintzen duten denbora, ilusio eta ahalegina. Herritarrei ere animatu zaie lehiaketan parte hartzera eta erosketak tokiko saltokietan egitera.
Parte hartu nahi duten establezimenduek Urola Garaiko Merkataritzako Bulego Teknikoan eman ahal izango dute izena, Urretxuko Labeaga kaleko 56. zenbakian, 747 48 61 52 telefonoaren bidez edo merkataritza.urolagaraia@gmail.com helbide elektronikora idatzita.
