Ezkio herriak San Migel Jaiak hartuko ditu maiatzaren 8tik aurrera, hiru eguneko egitarau zabal batekin. Antolakuntza taldeko kide batek adierazi duenez, jai hauek “herri girokoak” dira eta Ezkioko kaskoko eta beheko auzoetako bizilagunak elkartzeko balio dute. San Migelak goian ospatzen dira, eta San Pedro jaiak, berriz, Santa Lutzi eta Anduaga auzoetan, ekainean.
Jaiak maiatzaren 8an hasiko dira, goizeko 10:00etan botako den txupinazoarekin, azken urteetako hasiera goiztiarrena izanik. Lehenengo egunean, herritarren bizikleta igoera bat egingo da Santa Lutzi auzoko biribilgunetik Ezkioko kaskora. Iluntzean, ohiko sagardo dastaketaren ordez, bertso afari bat izango da, bertsolari ezagunekin.
Larunbatean, berrikuntza garrantzitsu bat izango da: Ezkioko euskal dantza taldeak dantza erakustaldia eskainiko du eguerdiko 12:00etan. Ondoren, herri bazkari jendetsua egingo da, eta arratsaldean, haurrentzako jolasak eta erromeria. Gauean, diskofesta batek girotuko du herria.
Igandean, jaien azken egunean, meza nagusia eta abesbatza baten emanaldia izango dira. Gainera, lehen aldiz, bertako eta inguruko produktuen azoka bat antolatuko da 11:00etatik 14:00etara eliz aurreko plazan, hainbat ekoizleren parte-hartzearekin. Goizeko ekintza nagusietako bat Izazpira igoera izango da, haurrentzako lasterketekin eta helduentzako erronkarekin. Arratsaldean, herri kirol erakustaldia egingo da 18:00etatik aurrera, eta ondoren, barrikote batekin emango zaie amaiera jaiei.
