Astigarraga herria jai giroan murgildu zen atzo, Santio Jaiak hastearekin batera. Ohiturari jarraituz, bi txupinazo izan ziren egunean zehar: bata eguerdian, haurrentzat bereziki antolatua, eta bestea arratsaldean, ekitaldi ofizial nagusia hasteko.
Eguerdiko txupinazo txikia Xaguxar aisialdi taldeak antolatu zuen, eta Udaletxeko balkoian izan zen. Eguraldiak lagunduta, eguzkipean, haurrek ura eta gozokiak jaso zituzten, giroa berotuz arratsaldeko ospakizunetarako. Ekitaldi honetan, pregona ere irakurri zen, eta globoak eta karameluak jaurti ziren.
Arratsaldeko zazpietan, berriz, txupinazo ofiziala izan zen. Juantxo Zuaznabar eta Periko Garmendia izan ziren aurtengo pregoilariak. Plaza bete astigartarren aurrean hasi ziren ofizialki jaiak, giro ezin hobean eta hasiera bikaina emanez.
