Denis Itsaso Etxebizitza eta Hiri Agendako sailburuak sinatutako deklarazioak hainbat neurri ahalbidetuko ditu, hala nola alokairuaren prezioa mugatzea, maizterren babesa indartzea, jabe handien jarduera arautzea eta etxebizitza eskuragarriak sustatzea. Kontratu berrietan prezioen igoerak mugatuko dira, eta erreferentziazko prezio-indizea aplikatuko da kasu jakin batzuetan. Gainera, indarrean dauden alokairu kontratuen ezohiko luzapenak eskatzeko aukera zabalduko da.
Etxebizitza hutsak alokairura bideratzeko eta etxebizitza parkea mobilizatzeko neurriak bultzatuko dira. Era berean, etxebizitza jabe handiei prezio-muga zorrotzagorrak ezarri ahal izango zaizkie. Udalerri bat gune tentsionatu izendatzeko, aurrez zehaztutako hiru irizpidetatik gutxienez bat bete behar da. Oñatiren kasuan, etxebizitzen salerosketa prezioen igoera nabarmena izan da azken bost urteetan (%33,80), Euskadiko KPIaren batezbestekoa (%19,4) eta hiru puntuko igoera (%22,4) gaindituz.
Deklarazio hau Oñatiko Udalak aurkeztutako diagnostikoaren eta 2026-2028 Etxebizitza Ekintza Planaren baitan onartu da. Planaren helburua etxebizitza-eskaintza handitzea, dagoen parkea hobeto aprobetxatzea eta herritarren beharrei erantzutea da. Izendapen honek 3 urteko balioa du eta urtero luzatu ahal izango da, betiere arrazoiek bere horretan jarraitzen badute.
