Mondragon Taldeak bere urteko kongresuan 'Indartu eta sortu' goiburua izan du ardatz nagusi, egungo proiektu kooperatiboak indartu eta etorkizuneko aukerak elkarrekin sortzeko erronka nabarmenduz. Kongresuak, gainera, politika sozioenpresarialaren lau ardatz estrategikoen garapena aurkeztu du.
Leire Mugerzak, Kongresuko eta Batzorde Iraunkorreko presidentea izan zen hitza hartzen lehena, etorkizuna elkarrekin eraikitzeko beharrezko araudi aldaketen onarpena azpimarratu zuen. Pello Rodriguezek, Kontseilu Orokorreko presidenteak, 2025eko ekitaldiaren balantzea egin zuen eta lau ardatz estrategikoak aurkeztu zituen: konpromiso eta nortasun kooperatiboa indartzea, etorkizuna duten negozioak sustatzea, eragin soziala handitzea eta interkooperazioa sendotzea. Ardatz horien barruan, hamabost proiektu nagusien aurrerapenak partekatu zituen.
Kongresuak interes estrategikoko ponentzia bat ere aztertu eta onartu zuen, Mondragon Inversionesen eginkizuna indartuz kooperatiben garapena babesteko eta negozio berrien sorrera bultzatzeko. Horren harira, hiru enpresa berri jarri dira martxan: Orbik Cybersecurity (zibersegurtasuna), Amets Power Electronics (potentzia-elektronika) eta Inkkia (adimen artifiziala). Urtea amaitzerako beste hiru negozio abiatzea espero da.
Bestalde, 2025ean kooperatibek eta Mondragon fundazioak 49 milioi euro baino gehiago bideratu zituzten gizarte-ekintzetara, pobrezia, hezkuntza, euskara, kultura, osasuna, kirola eta klima bezalako arloetan lan egiten duten mila erakunderekin elkarlanean. Udazkenean, gainera, Mondragonen proiektu kolektiboaren indarra islatuko duen atari bat jarriko dute martxan.
