Abixaranek 2016an hartu zuen bere gain Torreauzoko krosaren antolaketa, eta ordutik hona kirolaren izaera lehiakortik aldendu eta jarduera inklusiboagoa eta disfrutagarriagoa sustatzea izan da beraien helburua. Aurten, ekainaren 28an, hamarkada beteko dute filosofia honekin (pandemiagatik etenaldia kontuan hartuta, 9 edizio), eta parte hartze femeninoari bultzada berezia emango diote. Datuen arabera, arrakasta nabarmena izan dute: 2015ean 16 emakumek parte hartu zuten eta iaz 90ek (horietatik 64 oñatiarrak).

Helburu argia dute: kirolaren izaera integratzailea ikusgarri egitea eta askotan oztopo mentalak fisikoak baino zailagoak direla erakustea. Abixaranek probaren gidaritza hartu zuenetik, bere izaera herrikoia mantendu du eta publiko zabalago eta anitzago batentzako ateak ireki ditu, lehenik emakumezkoen izen-ematea sustatuz, gero taldekako kirola (gutxienez hiru laguneko taldeetan) eta azken edizioetan oztoporik gabeko kirolaren alde eginez.

Ildo horretan, ekainaren 28an, lehen irteera (10:00etan) eskuko bizikletan, kirol gurpil-aulkian edo patinean ibilbidea egiten duten parte-hartzaileentzat izango da. Ondoren, 10:30ean, gainerako parte-hartzaileentzako irteera egingo da, gehienez 300 laguneko kupoarekin eta 7,5 kilometroko ibilbidearekin (Etxe Aundi tik Olate ra eta buelta).

Azken bi urteetan dortsalak agortu egin dira (azken edizioan, lasterketa baino hamar egun lehenago), beraz, Abixaranek animatu egiten du izen-ematea garaiz betetzera www.herrikrosa.eus webgunean. Izen-ematea 12 eurokoa da ekainaren 26ra arte, 22:00ak arte; ondoren, dortsalak geratuko balira, prezioa 18 eurora igoko litzateke lasterketa eguneko 9:00ak arte.

Parte hartzaile guztiek kamiseta, poltsa eta esker oneko hamaiketako tradizionala jasoko dituzte. Horrez gain, zozketak izango dira, Oñatiko saltokien eta kros herrikoiaren babesleen laguntzari esker. Torreauzoko kontagailua martxan da jada.