Goiena Komunikazio Taldeak 2004an sortutako Danbaka jaialdiak etenaldia hartuko du 2026tik aurrera, eta 2028an itzuliko dela aurreikusten da. Hasiera batean bi urtean behin egiteko sortu zen ekimena, eta 2004, 2006, 2008 eta 2010ean antolatu zen Elgetako Espaloia Kafe Antzokian.
Arrazoi ezberdinak tarteko, etenaldi luzea izan zuen jaialdiak, eta 2022ra arte ez zen berreskuratu. Urte hartan, Bergarako Seminarixora lekualdatuta, Debagoieneko musika proiektuak protagonista izan ziren berriro ere.
2022ko edizio arrakastatsuaren ostean, 2024an seigarrena antolatzera animatu zen Goiena. Gaur egun, 2026rako prestaketekin hasita zeudela, hausnarketa sakon bat eginda atseden hartzea erabaki dute. "Batzuetan, etorkizuna bermatzeko geratzen jakin behar delako", azaldu dute.
“"Sentsazioa dugulako Debagoiena oso bailara musikazalea izanda ere, ez duela azken bi urteetan halako ekimen bat antolatzeko beste proiektu berri eman. Alegia, salda berriaren zain dagoela lapikoa, eta su-txikian kozinatzen dena beti denez zaporetsuagoa, zazpigarren edizioa 2028an antolatzea erabaki dugu."
Taldeek etenaldiak egiten dituzten bezala, Danbakak ere eten bat egitea erabaki du, etorkizunean ere emankorra izaten jarrai dezan. Horrela, zazpigarren edizioa 2028an antolatzea erabaki dute, "salda berriaren zain" dagoen proiektuarentzat.
