Oñatiko Udalak bere Hiri Antolamenduko Plan Orokorraren (HAPO) hasierako dokumentua aurkeztu du, etorkizuneko hiriaren plangintza jasotzen duena. Dokumentuak zehazten du non egingo diren etxebizitzak, industriaguneak non aurreikusten diren, berdeguneak nolakoak izango diren eta kirol instalazio berrietarako tokia non aurreikusten den.
Hasierako dokumentua Udalak landu du eta Santa Ana antzokian aurkeztu zitzaien herritarrei. Bertan izan ziren Izaro Elorza alkatea, Iñigo Ruiz hirigintza batzordeburua eta lanaren lanketan aritu diren Sabai Arkitektoak eta Araudi enpresetako ordezkariak.
HAPOaren oinarriak finkatzeko saioetan, herritarren proposamenak jasota, erabaki zen herrigune kohesionatu baten alde egitea, hurbiltasuna eta zerbitzuetara heltzeko erraztasunak eskainiz. Gainera, etxebizitza berriak herrigunetik gertu dauden lurzoru urbanizagarrietan egitea sustatuko da, lurzoru ez-urbanizagarriak ez okupatzen saiatuz. Ingurumena zaintzea eta lehen sektorearentzat garrantzitsuak izan litezkeen lurrak interes berezikotzat hartzea ere jasotzen du planak.
Iraunkortasuna ardatz hartuta, klima larrialdiari aurre egiteko eta energia berriztagarrien sorkuntzarako azpiegiturak instalatzeko aukerak eskainiko dira. Horrez gain, berdintasun ikuspegitik, zaintza erraztuko duen herri bat eraikitzea du helburu planak.
Planak hainbat ataletan banatuta aurkeztu zen. Etxebizitzaren alorrean, 751 etxebizitza berri aurreikusten dira, horietatik 150 babes ofizialekoak eta 186 tasatuak izango lirateke. Jarduera ekonomikoen atalean, industriarako lur erreserba sortzeko aukera aztertzen ari da. Espazio libre eta berdeguneei dagokienez, ibaia berreskuratzea eta balioan jartzea bilatzen du planak, aisialdirako eta ingurumen-babeserako espazioa nabarmen handituz. Landa eremua babestea ere helburu du, lehen sektoreari lotutako lurrak eta jarduerak zein paisaia eta natura-balioak kontuan hartuta.
Iñigo Ruiz Barron hirigintza batzordeburuak adierazi duenez, "epe luzeko" plan bat lantzea izan da helburua, etorkizuneko erronkak identifikatu eta norabide argia ezarriz. Izaro Elorza alkateak azpimarratu du HAPOa ez dela "edonolako erreminta", herriaren etorkizuna zehaztuko duela eta prozesua berme guztiekin eta herritarrekin batera egitearen garrantzia nabarmendu du.
Hasierako onarpen dokumentua jendaurrean dago eta fitxa partikularrak udalaren webgunean kontsulta daitezke. Aholku Kontseiluaren irizpena jaso ondoren, urtea bukatu aurretik osoko bilkurara eramango da dokumentua hasierako onespenerako. Ondoren, hiru hilabeteko alegazio-epea zabalduko da, herritarrek dokumentua aztertzeko eta ekarpenak egiteko denbora nahikoa izan dezaten.
