Elgoibar izango da Gipuzkoako Foru Aldundiak antolatutako Ongizatearen Plaza ekimenaren hurrengo geltokia, irailaren 10ean (osteguna) eta 11n (ostirala). Aurrez Legazpi, Hernani, Pasaia, Deba, Donostia eta Hondarribian izan ondoren, herri honetan ongizatea ikuspegi askotatik lantzeko aukera izango dute herritarrek.
Topaketa honetan, zahartze eta elikadura osasuntsua, ongizate digitala, ariketa fisikoa, nahi ez den bakardadea, pantailen erabilera arduratsua eta emakumeen osasuna bezalako gaiak landuko dira. Era berean, sorkuntzak eta industriak ongizatean duten eragina ere jorratuko dute Kalegoen plazan egingo duten ekimenean.
Eider Mendoza diputatu nagusiak azpimarratu du ekimen hauen bidez pertsonen ongizate integrala "plazaren erdigunean" kokatu nahi dela, Foru Aldundiaren "lehentasun nagusia" dela adieraziz. "Ezinbestekoa da gai guzti hauek modu ireki, konpartitu eta parte-hartzailean lantzea", gaineratu du, eta elgoibartar guztiak gonbidatu ditu parte hartzera.
Irailaren 10ean, osteguna, egitaraua Adinberriren eskutik hasiko da. Goizean, ariketa fisikoko saio irekia, estimulazio kognitiboko tailerra eta mindfulness terapia eskainiko dira. Ondoren, Jakoba Errekondo agroekologian adituak elikadura arduratsu eta jasangarriaren gakoak azalduko ditu, hiru nekazari gazterekin batera. Arratsaldean, 17:30etik aurrera, etorri berrien eta bertakoen arteko solasaldia izango da hizkuntza, nortasuna eta elkarbizitzari buruz. Eguna borobiltzeko, Idoia Torregarai umoregileak barrearen eta umorearen bidez ongizate emozionala lantzeko tailerra emango du.
Irailaren 11n, ostirala, gazteen ongizatean jarriko da fokua. Goizean, sare sozialen adikzioa, gaitasun sozialen galera eta suizidioaren hautua bezalako gaiak landuko dituzte gazteekin solasaldi batean. Ondoren, makina-erremintak Elgoibarren izan duen historiari eta ongizateari lotuta, industriaren egungo egoera eta etorkizuneko erronkak aztertuko dituzte sektoreko profesionalekin.
Arratsaldean, hiru zati izango ditu programazioak. Lehenik, 17:00etatik aurrera, Altxa Burua elkartearekin batera, 'Pantailen aroan, erabilera osasungarria' izenburupean saio dinamiko bat egingo dute, bereziki gurasoei zuzenduta, teknologia digitalaren erabilera arduratsua sustatzeko. Jarraian, 18:30etik 19:30era, sorkuntzak ongizatean duen eraginaren inguruan hausnartuko dute herriko sortzaileekin. Bukatzeko, Mausitxako gazta eta Lizagasar sagardoarekin bi eguneko topaketari amaiera emango diote.
