Egungo etxebizitza krisiaren aurrean, HAPOa da udal tresnarik garrantzitsuena egoerari aurre egiteko. Hala ere, planak zortzi urteko denbora-horizontea soilik jasotzea akatsa dela uste du alderdiak, aurreko plangintzek, oro har, hogei urte inguruko indarraldia izan baitute. Egungo planteamendua motz geratzen da etorkizuneko beharrei erantzuteko.
Etxebizitzen kopuruari dagokionez, HAPOak 680 etxebizitza berri aurreikusten ditu, eta ez 863, Torreagako etxebizitzak dagoeneko gauzatuta, esleituta edo lizentziadun egongo direlako HAPOa behin betikoa onartzen denerako. EH Bilduk proposatzen du datozen hamabost urteetarako 1.300 etxebizitza berri inguru eraikitzea, eta horietatik 500 etxebizitza publiko izatea.
“"Udalak Zumaia bizitegi-merkatuko gune tentsionatu gisa izendatu zuen. Indarrean dagoen legediak ezartzen duenez, udalerriko etxebizitza-parke osoaren %20a babes publikoko etxebizitzek osatu beharko dute 20 urteko epean. Hala ere, onartutako HAPOarekin helburu hori betetzea ezinezkoa litzateke, eta, ondorioz, ez litzateke etxebizitza krisiari benetako irtenbiderik emango."
Gainera, alderdiak uste du planak erantzun eskasa ematen diela jarduera ekonomikorako lurzoruaren aktibazioari, hiri-mugikortasunari, ekipamenduen plangintzari eta, oro har, hiriaren kalitatea hobetzeko aukerei. Basusta bezalako eremuak txertatzeak hasierako onespenera itzultzea eta parte-hartze prozesu berria egitea ekarriko lukeela adierazi dute. Hala ere, borondate politikoa balego, onespen eta jendaurreko erakustaldi berria modu arinean egitea posible litzatekeela uste dute, hiru hilabete inguruko iraupena izango lukeen prozesu batean.
Epe ertain eta luzera etxebizitza krisiari benetako irtenbideak ematea premiazkoa dela azpimarratu dute, eta horregatik, EH Bilduri borondate politikoa eskatu diote norabide horretan aurrera egiteko. Ondorioz, HAPO hau anbizio faltakoa eta kontserbadorea dela iruditzen zaie, eta ez diola Zumaiak bizi duen etxebizitza krisiari behar bezalako erantzunik ematen.
