Zumaia herriak Euskal Jai Eguna ospatuko du ostiral honetan, abuztuaren 7an. Egun osoan zehar, herria musikaz, kulturaz eta ekitaldiz beteko da, adin guztietako jendea bertaratzera gonbidatuz.
Goizeko 9:00etan hasiko dira ospakizunak, Zumaiako Musika Eskolako dultzaineroen eskutik. Ondoren, 10:00etatik 14:00etara, Alde Zaharrean baserriko produktuen azoka izango da, eta kaleak musikaz alaituko dira.
Eguerdi partean, Miren Artetxe eta Xabat Illarregi bertsolariek saioak eskainiko dituzte Udaletxeko balkoitik eta Kofradiako balkoian, 12:00etatik aurrera. Aldi berean, Zutrik taldeak trikitixa doinuak joko ditu, eta Larraina Euskara Elkarteak eta Korokoiak taldeak antolatutako kantujira abiatuko da.
Herri bazkariak ehunka lagun bilduko ditu 13:00etan Eusebio Gurrutxaga plazan, eta bazkalostean Joxe Mendizabalek girotuko du giroa.
Arratsaldean, 18:00etan, haurrentzako dantzaldia izango da Amaia plazan Joxe Mendizabalekin. Ordubete geroago, Eusebio Gurrutxaga plazan, Jagoba eta Maddalen trikitilariek eta Jainekin txarangak joko dute.
19:00etatik aurrera, Gipuzkoako Sagardogileen Elkartearen eskutik sagardo dastaketa egingo da Eusebio Gurrutxaga plazan. Bertan, hamar ekoizleren sagardoak dastatzeko aukera izango da, euro 2-tan basoa eta 3-tan kopa eskuratuz. Edalontziak eta kopak 21:00ak arte itzul daitezke.
Eguna 22:30ean amaituko da, Amaia plazan Laket taldeak eskainiko duen dantzaldiarekin. Eguraldi txarra eginez gero, emanaldia Kofradian izango da.
Udalak eskerrak eman dizkie Alde Zaharreko bizilagunei azokaren muntaketak, auzoa prestatzeko lanek eta edukiontzien lekualdaketek eragindako eragozpenen aurrean erakutsitako pazientziagatik.
