Zarautz Kirol Elkarteko halterofilia sailak lorpen garrantzitsuak pilatu ditu azken asteetan. Taldeko kirolari bat nazioarteko lehietan murgilduta dago, Europako Txapelketan zortzigarren postua lortu ondoren, Egipton jokatuko den Junior Munduko Txapelketan lehiatuko da gaur arratsaldeko 19:30ean. Horrez gain, Euskadiko txapelketan ere parte hartuko du.
Bestalde, joan den asteburuan Uranzu frontoian ospatu zen Gipuzkoako Txapelketa Nagusian, Bidasoa Halterofilia Taldeak antolatuta, ZKE Halterofiliak 19 kirolarirekin hartu zuen parte. Emaitza bikainak lortu zituzten, bai kategoria bakoitzeko sailkapenetan, bai sailkapen orokorrean. Guztira, sei Gipuzkoako txapeldun izan zituen klubak.
Emakumezkoen kategorian, ZKEko zazpi kirolari lehen hamarren artean sailkatu ziren sailkapen orokorrean, horien artean lehen hiru postuak lortuz. Gizonezkoetan, berriz, hiru kirolari sailkatu ziren lehen hamarren artean. Txapelketa hau maiatzaren 23an Gasteizen jokatuko den Euskadiko Absolutu Txapelketarako sailkagarria izan zen, eta lehen hamar sailkatuek zuzenean lortu dute bertan parte hartzeko txartela.
Harrobia ere indartsu dator, apirilaren 18an Zarautzen jokatutako Euskadiko Teknika Txapelketan (15 eta 17 urtez azpikoak) emaitza bikainak lortu baitituzte. Gainera, maiatzaren 23an Alcañizen ospatuko den Espainiako Sub-17 Txapelketan bost kirolarik parte hartuko dute ZKE Halterofiliaren izenean.
Klubak adierazi duenez, 2026rako ezarritako helburuak betetzen ari dira. Emakumezkoen ohorezko mailako taldea estatuko hamar onenen artean mantentzen ari da bere lehen urtean, eta azaroan Erregina Kopa-rako sailkapena lortzeko bidean da. Gizonezkoen taldea, berriz, lehen mailan mantentzeko helburua betetzen ari da. Emakumezkoen bigarren taldea lehen lau sailkatuen artean dago, eta 17 eta 15 urtez azpiko nesken taldeek ere postu nabarmenak dituzte.
