Zarautzek Boluntariotza Azokaren bosgarren edizioa hartuko du igande honetan, maiatzak 9, Malekoian, 11:00etatik 14:00etara. Ekimen hau Udalak antolatu du Gizalde, Gipuzkoako Boluntariotza Sarearekin elkarlanean, eta helburua da boluntariotzaren lana ikusaraztea eta herritarrei hurbiltzea.
Azokak gizarte-ekintzarekin lotutako 17 elkarte bilduko ditu, beren lana ezagutzera emateko eta boluntario gisa lagundu nahi duten pertsonei informazioa eskaintzeko. Horrez gain, nazioarteko lankidetzarekin zerikusia duten beste 12 erakundek parte hartuko dute Zarauzko Solidaritate Koordinadora gunean.
“"Boluntariotza zaintza ekosistemaren oinarrizko zutabeetako bat da. Gaur egun ezin dugu ulertu arreta-eredu bat ikuspegi komunitariorik gabe. Boluntariotzak zaintza partekatuan oinarritutako komunitate bat eraikitzen laguntzen du."
Aurtengo edizioa berezia izango da, Nazio Batuek 2026. urtea Boluntariotzaren eta Garapen Jasangarriaren Nazioarteko Urtea izendatu baitute. Testuinguru horretan, topaketaren helburua da gizarte-elkarteen lana ikusaraztea, boluntariotzaren garrantzia aitortzea eta errealitate hori Zarauzko herritarrei hurbiltzea.
Parte hartuko duten elkarteen artean, besteak beste, ASEBIER, Itxaropenaren Telefonoa, Atzegi, AGI, DYA, Bizi Bide, Nagusilan, Bidez Bide, Gizalde-Sareginez, Afagi, Gurutze Gorria, ASPACE, Bihotzez, ACABE, ADEMGI, Garagune eta Agadelprise egongo dira. Zarauzko Solidaritate Koordinadora postuan, berriz, Munduko Begiak, Ibarratik Misio Taldea, Zaporeak, TAU Fundazioa, Calcuta Ondoan, ORI-ZAUTZ, MISEVI, ACOES, AMS, PROYDE-PROEGA, Hirugarren Adina eta Salvamento Marítimo Humanitario elkarteek hartuko dute parte.
