Batel liga amaitu berri, Gipuzkoako Trainerilla Liga abiatu da asteburuan, Gipuzkoako Arraun Federazioak antolatuta. Lehen estropadak Orioko errioan jokatu ziren larunbat arratsaldean, non 36 ontzi lehiatu ziren kadete, jubenil eta absolutu mailetan.

Eskualdeko arraunlariek errendimendu nabarmena erakutsi zuten. Orioko mutilek garaipena lortu zuten absolutu mailan, bai Ligan bai Kopan. Zarauzko taldeak ere bikain aritu ziren, mutilek kadeteen mailan garaipena eskuratuz.

Zumaia eta Getaria ere ondo aritu ziren. Zumaiako neskek lehen bi postuak eskuratu zituzten absolutu mailan, eta Getariako mutilek bigarren postua lortu zuten absolutu mailako Ligan.

Bestalde, igande arratsaldean, Zumaian, San Telmo jaietako errepikapenetan, trainerilla estropadak jokatuko dira 17:30etik aurrera. Bi bandera izango dira jokoan: emakumezkoen XII. San Telmo saria eta gizonezkoen XLI. San Telmo saria. Irteera eta helmuga puntuak Arranpla parean kokatuko dira, eta ontziek lau luze eta hiru ziaboga egingo dituzte barraren hasiera inguruan.