Zarautz en egoitzan ospatu zen ekitaldian, Gipuzkoako Foru Aldundiko eta UKUEko ordezkariak, programako parte-hartzaileak eta irakasleak bildu ziren. Ekitaldiak parte-hartzaileen ahalegina eta egindako ibilbidea aitortu zituen, lan-merkatuan sartzeko aukerak zabaltzeko helburuarekin.
ElkarEKIN Lanean ekimena, Gipuzkoako Foru Aldundia ren estrategiaren barruan kokatzen da, eta lurraldeko eragileen arteko lankidetzaren bidez pertsonen laneratzea sustatzea du helburu. Urola Kosta eskualdean, bertako lan-merkatuko beharrizanetara egokitutako hainbat formazio-ibilbide garatu dira.
Programaren bidez, parte-hartzaileek ziurtagiri profesionalak lortzeko formazioa, prestakuntza zeharkakoa eta laneratze-prozesuan laguntza jaso dute. Zenbait ibilbidetan, euskara-eskolak ere eskaini dira, formazio teknikoaren osagarri gisa.
Garatutako ibilbideek hainbat sektore profesional landu dituzte, hala nola industria, zaintza, sukaldaritza, estetika eta garraioa. Horrela, formazio teknikoa laneratzearekin uztartu da, parte-hartzaileen gaitasunak indartzeko eta lan-aukerak zabaltzeko.
Ion Arozena, UKUEko presidentea, parte-hartzaileen ahalegina nabarmendu zuen, eta azpimarratu zuen ElkarEKIN Lanean bezalako programak "pertsonen gaitasunak indartzeaz gain, beren lan-aukerak zabaltzen laguntzen dutela". Era berean, programaren oinarrian dagoen lankidetzaren garrantzia azpimarratu zuen: "Horrelako ekimenek ezin dute aurrera egin eragile bakar baten lanarekin; erakundeen, formazio-entitateen, enpresen eta beste eragileen arteko lankidetza ezinbestekoa da".
Bestalde, euskararen garrantzia ere nabarmendu zuen formazio-ibilbideetan: "Gure formazioetan eskualde honen eta lurralde honen identitatea islatu nahi dugu, eta horregatik, euskara formazioaren ezinbesteko zati bat dela uste dugu". Zentzu horretan, "ez bakarrik prestakuntza profesionalari lotutako formazioa, baita gure inguruneari eta eskualdeko errealitateari lotutakoa" eskaintzea garrantzitsua dela adierazi zuen.
Azkenik, Urola Kostako Udal Elkartearen konpromisoa berretsi zuen "eskualdeko pertsonen formazioaren eta enpleguaren alde lanean jarraitzeko", eta entregatutako diplomak "ibilbide baten amaiera baino gehiago direla: etapa berri baten abiapuntu direla" adierazi zuen. ElkarEKIN Lanean programaren zutabeetako bat da eragile publiko eta pribatuen arteko lankidetza, lurralde bakoitzeko enpleguaren erronkei erantzun koordinatua emateko. Koldo Peciña, Gipuzkoako Foru Aldundiko Proiektu Estrategikoen zuzendariak, ElkarEKIN Laneanen izaera estrategikoa nabarmendu zuen, pertsonen aukerak hobetzeko eta lurraldeko ehun ekonomikoa indartzeko duen ekarpena azpimarratuz.
Diplomak ematearekin batera, parte-hartzaileek beren formazio-ibilbideari amaiera eman diote eta orain etapa berri bati ekingo diote beren ibilbide profesionalean, programan zehar eskuratutako ezagutza eta gaitasunekin.
Urola Kostako Udal Elkarteak parte-hartzaileek egindako ahalegina eta inplikatutako erakunde guztien baterako lana balioetsi ditu, enplegurako sarbidea erraztu eta Urola Kostako aukera profesionalak hobetuko dituzten ekimenak bultzatzen jarraitzeko garrantzia azpimarratuz.
