Ikerketaren helburu nagusia Gasteizko haur eta nerabeek eskolaz kanpoko aisialdian zer jarduera egiten dituzten, jarduera horietan zer hizkuntza erabiltzen diren eta, zehazki, euskarak zer leku duen jakitea izan da. Ikerketa honek euskararen biziberritze prozesuan hezkuntza ez-formalaren eta aisialdiaren garrantzia azpimarratzen du.
Datu bilketarako, bi iturri nagusi erabili dira. Batetik, Gasteizko Udaleko datu-basea, udalak antolatutako aisialdi jardueren eta parte-hartzaileen inguruko informazioarekin. Horri esker, 2016tik aurrerako programazioaren ezaugarri nagusiak lortu dira. Bestetik, ikastetxeen bitartez, Lehen Hezkuntzako eta Derrigorrezko Bigarren Hezkuntzako 1.143 ikasleri inkesta bana egin zaie, 6 eta 16 urte bitarteko haur eta nerabeen aisialdiari buruzko datuak eskuratuz.
“"Aisialdia abagune egokia izan daiteke euskaraz hitz egiteko ohitura areagotzeko eta adinkideen arteko jardueretan euskara txertatzeko."
Ikerketaren arduradunek adierazi dutenez, aisialdia euskara sustatzeko bide garrantzitsua izan daiteke, baina horretarako "kontzientziazio eta sentsibilizazio ariketa esanguratsua" eskatzen zaie bertako eragileei. Horrek esan nahi du aisialdiko eragileek aktiboki lan egin behar dutela euskararen erabilera bultzatzeko.
