Biharko saioan, Orioko udalak ibilgailu elektrikoak kargatzeko sare publiko bat instalatzeko emakida kontratua adjudikatuko du. Proiektuaren helburua herrian lau karga puntu jartzea da, gaur egun zerbitzu hori ez baitago herrian. Instalazio horiek kudeatzeko eta mantentzeko ardura esleituko dute.
Beste gai garrantzitsu bat 2026-2029 aldirako emakume eta gizonen berdintasunerako III. Plana onartzea izango da. Horrez gain, 2025eko kontu orokorra eta udal aurrekontuaren kreditu aldaketak bozkatuko dituzte.
Azkenik, 2027ko herriko jaieguna zehaztuko dute eta Foruen abolizioaren 150. urteurrenari zein Alkateen Mugimenduaren 50. urteurrenari buruzko mozioa eztabaidatuko dute. Bilkura zuzenean jarraitu ahal izango da udalaren webgunean.
