Mikel Portularrume Paorra (Aia, 1983) da Telmo Deun arraun elkarteko gizonezkoen traineru taldeko entrenatzaile berria, aurten ere KAE 1 ligan arituko dena. Entrenatzaileak taldea osatzeko izandako zailtasunak eta denboraldi berrirako ezarritako helburuak partekatu ditu elkarrizketa honetan.
Arraun munduan ibilbide luzea du Portularrumerrek, bai arraunlari gisa, hogei bat urte inguru, baita entrenatzaile gisa ere. "Harrak hor segitzen du beti. Gustuko ofizioa dut", adierazi du, arraunarekiko duen pasioa nabarmenduz. Aurretik, Santurtzin urtebetez aritu zen entrenatzaile lanetan, eta ondoren, Lapurdi ko taldean iazko denboraldia egin zuen.
Zumaiara iristeko erabakia azaldu du: "Lapurdin segitzeko asmoa nuen, baina eskifaia osatzeko nahikoa lan genuen. Hemen ere, komeriak izan ditugu taldea osatzeko. Komeria oso handiak". Kluba "kanpotik begiratuta klub handia eta historia handikoa" dela aitortu arren, "kristoren zorra" zegoela esan diote iristean. Material aldetik ere "berritu behar" dela gaineratu du.
Zuzendaritzak jarritako helburu nagusia trainerua ateratzea izan da, baina Portularrumerrek lehiakortasuna eta taldearen "ahalik eta ondoen eramatea" bilatzen ditu. "Gure lana egiten badugu, goiko postuetan egoteko esperantzak baditugu", esan du. "Igoera etortzen bada, ondo", gaineratu du, baina "mutilak gustura ateratzea uretatik" dela pozgarriena entrenatzailearentzat.
Gaur egun, hamazazpi lagunek osatzen dute eskifaia, apirilean Ondarroatik etorritako hiru lagunekin osatu dena. Entrenatzaileak aitortu du arraunlariak "pixka bat itzalduta" nabaritu dituela animo aldetik, baina "pixkanaka animatzen eta motibatzen joan dira" neguko lanari esker.
Denboraldiari begira, "lehiatzeko harra pizten da" eguraldia hobetzen eta egunak luzatzen diren heinean. Arraunaren atzean dagoen lan "etengabea" azpimarratu du, gosea, pisua eta entrenamendu gogorrak barne, eta horregatik jarraitzen du jendeak arraunean, nahiz eta "gero eta gazte jende gutxiago aritzen den arraunean".
