Joan den igandean, Gipuzkoako Trainerilla Txapelketak jokatu ziren Mutrikun. Telmo Deun taldeak hiru ontzi aurkeztu zituen lehiara, eta emakume seniorren taldeak lan bikaina egin zuen, hirugarren postua lortuz. Garaipena Oriorentzat izan zen 15:20,41 denborarekin, eta San Juan izan zen bigarren, 15:23,89 denborarekin. Zumaiako kadete neskek ere hirugarren egin zuten, eta jubenil mutilek, laugarren.

Txapelketaren bezperan, larunbatean, Gipuzkoako trainerilla liga amaitu zen Hondarribian jokatutako seigarren jardunaldiarekin. Sailkapen orokorrean, Zumaiako emakume seniorrak hirugarren postuan geratu ziren, San Juan B eta Orioren atzetik. Zumaia B bosgarren izan zen. Kadete nesketan Zumaia bosgarrena izan da sailkapen orokorrean, jubenil mutiletan laugarren, eta senior mutiletan bederatzigarren. Kopan, azkenik, senior mutiletan zortzigarren izan da Zumaia B.

Datorren asteburuan, arraunlariek Ondarroan (Bizkaia) izango dute hitzordua, modalitate horretako Euskadiko Txapelketak jokatuko baitituzte. Horrez gain, Espainiako Txapelketak ere orduan izango dira, Castron (Kantabria, Espainia).