Donostiako epaitegietan aurkeztu du familiak eskaera, zeinak CAFekin batera Azpeitia Hermanos, Montajes Nadur, Iberica de frio, Plasticos ABC Spain, Onena bolsas de papel eta Volkswagen Navarra auzitara eraman dituen. Asviamie, amiantoaren biktimen Euskadiko elkarteak jakinarazi duenez, enpresei "amiantoarekiko segurtasun arautegia ez betetzea eta lanak eragindako kalte eta ondorengo heriotza" leporatzen diete.

Aipatutako langileak, Honorio B. izenez identifikatu dena, 1974ko urtarriletik 1986ko martxora bitartean aritu zen lanean CAF enpresan, tornulari gisa. 2024an diagnostikatu zioten mesotelioma pleurala, eta elkarteak zehaztu duenez, "langilea amiantoaren eraginpean egon zen CAFen lan egin zuen tartean, tornulari bezala 144 sekzioan".

Nafarroako Osasun Zerbitzuak 2025eko otsailaren 13an zabaldutako txosten batean adierazi zuen patologiaren jatorria lantokia izan zitekeela. Txosten horretan, CAFen eta auziperatutako beste enpresetan egindako lanak deskribatu ondoren, ondorioztatzen dute: "Litekeena da mesoteliomak amiantoarekin izandako esposizioarekin erlazioa izatea. Mesotelioma amiantoarekiko esposizioaren markatzailerik onena da, biztanleria orokorrean ezohikoa den neoplasia bat delako, eta arrisku faktore nagusia esposizio hori delako".

Gaur goizean, Asviamie elkarteak elkarretaratzea egin du epaitegien aurrean, familiak jarritako demandari babesa adierazteko.