Larunbat arratsaldean Donostian jokatzekoa zen Fabrika Bandera eguraldi eta itsaso baldintza txarrengatik erabat baldintzatu da. Hasiera batean estropada jokatuko zela zirudien arren, egoerak okerrera egin du eta bi ligetako probetan ezustekoak eragin dira.
TKEk adierazi duenez, erabakiak hartzerakoan kirolarien segurtasuna izan da lehentasun nagusia, eta etengabeko harremanetan egon dira Eusko Jaurlaritzako Segurtasun Sailarekin eta Itsas Kapitaintzarekin.
Euskotren Ligako estropada 17:15ean hastekoa zen, baina emakumezkoen zortzi klubetako entrenatzaile gehienek arraun egiteari uko egin diote itsasoaren egoera dela eta. Hasiera batean Donostiarrak eta San Juanek ez zuten plantoarekin bat egin, baina azkenean, 18:00ak baino lehen, Batzorde Teknikoak estropada behin betiko bertan behera uztea erabaki zuen.
Gizonezkoen Eusko Label Ligako proba aurrera atera da, baina formatua aldatzera behartu ditu. Estropada eremua aztertu ondoren baliza bat mugituta zegoela ohartu dira. Horren ondorioz, 18:30ean hasi da erlojupean, 3. kaletik soilik jokatuta eta hiru txandak lau minutuko tartearekin. Oriok irabazi du proba, Hondarribiari 23 segundoko aldea aterata.
