Kanpaina honek funtsezko zerbitzu publiko bati balioa ematea du helburu, askotan oharkabean pasatzen zaiguna. Txorrota irekitzea eguneroko keinua bada ere, ura etxeetara iristeko prozesu luzea dago atzetik: hartzea, tratatzea, biltegiratzea, banatzea, eta erabili ondoren biltzea, araztea eta ingurune naturalera itzultzea. Horren guztiaren atzean azpiegitura, teknologia, inbertsio iraunkorra eta 260 profesional baino gehiagoren eguneroko lana daude.
Kanpainaren helburu nagusietako bat da herritarrei azaltzea uraren prezioa ezin dela ulertu toki desberdinetan metro kubikoak duen prezioa soilik alderatuta. Lurralde bakoitzaren ezaugarriek zerbitzua emateko behar diren azpiegiturak baldintzatzen dituzte, eta, beraz, baita kostuak ere. Gipuzkoak errealitate bereziki konplexua du, udalerri txiki, bailara eta herrigune ugari baitaude sakabanatuta.
Gipuzkoako Urak-ek lurraldearen % 88,76ri ematen die zerbitzua, 345.000 biztanle ingururi, eta horretarako 7 urtegi, edateko ura tratatzeko 14 estazio, 259 biltegi eta 10 araztegi kudeatzen eta mantentzen ditu. "Uraren prezioa hainbat lekuren artean alderatzen dugunean, atzean dagoen zerbitzua ere alderatu behar dugu. Azpiegiturak eta beharrak ez dira berdinak lurralde guztietan eta, beraz, uraren ziklo osoa bermatzeko behar diren kostuak ere ez. Herritarrek informazio hori izatea eta ordaintzen duena zergatik ordaintzen duen ulertu ahal izatea nahi dugu", azaldu du Iñigo Elosegik.
Testuinguru horretan, Gipuzkoako Ur Kontsortzioak-en metro kubiko baten batez besteko prezioa 2,10 euro ingurukoa da, Espainian 2,23 eurokoa eta Europan 3,90 euro ingurukoa da bataz beste, Kontsortzioak jasotako datuen arabera.
"Uraren balioa" kanpainak errealitate hori guztia herritarrei modu erraz, argi eta bisualean azaltzea du helburu. Horretarako, landing orrialde propioa izango du, uraren zikloari, azpiegiturei eta zerbitzuaren kostuan eragiten duten elementuei buruzko informazioa bilduko duena. Gainera, "Uraren bidaia" ikus-entzunezko pieza bat ere prestatu da, urak egiten duen ibilbidea erakusten duena, bilketatik hasi eta araztu eta naturara itzultzen den arte.
Kanpainaren barruan, sare sozialetarako infografiak eta dibulgazio-edukiak ere prestatu dira, kanpainaren mezu nagusiak modu erraz eta bisualean zabaltzeko. Kanpaina hau kontsortzioa osatzen duten 76 udalerri guztientzat pentsatuta dago, udal bakoitzak bere egin eta bizilagunei hurbildu ahal izateko.
