Zumaiako Udalak amaitu ditu jadanik Erkibeko lorategiko lanak, eta orain, eraikinari dagokion prozesua abiatuko du. Helburua da bertan elikadura burujabetzarekin lotutako proiektu bat garatzea, baina horretarako, lehenik eta behin, herritarren ekarpenak jasoko ditu. Datozen hilabeteetan, herritarrei eta tokiko eragileei zuzendutako hainbat saio, eztabaida eta topaketa antolatuko dira, eta lehenengoa etzi, asteazkena, izango da.
Udalak azaldu duenez, denbora luzez aritu da lanean herrian elikadura burujabetza ardatz izango duen merkatu bat sortzeko. 2023an, LZB arkitektura kooperatibaren laguntzarekin, Erkibe bertako produktuen merkatu bilakatzeko aurreproiektua landu zen. Horrez gain, Albergak bezalako herriko eragile batzuek ere elikadura proiektu bat aurkeztu zuten, elikadura burujabetza bultzatuko zuena.
Orain, azken urteetan egindako lana herritarrei aurkezteko prozesua jarriko du martxan udalak. Farapi eta Biziola kooperatibek gidatuko dute prozesua, eta bi fasetan banatuko da. Lehenengoan, entzute eta diagnostiko lana egingo da: udalak galdetegi ireki bat zabaldu du –esteka honetan bete daiteke–, eta eztabaida saioak ere izango dira datozen egunetan. Horrela, proiektuaren inguruko lehen iritziak eta beharrak jasoko dira, eta herrian dagoen ikuspegia eta interesa ezagutuko da. Ekoizleek, merkatariek, herritarrek eta udal ordezkariek parte hartuko dute hausnarketa horretan.
Bestalde, lehenengo saioa asteazken honetan izango da, Oxford aretoan, 18:00etatik aurrera. Udalak gaiaren inguruan interesa izan dezakeen oro bertaratzera deitu du. Saioaren antolaketa errazteko, izena emateko eskatu dute turismo bulegoan, 943-14 33 96 telefono zenbakira deituta edo turismoa@zumaia.eus helbidera idatzita.
Udaren ostean helduko dio udalak prozesuaren bigarren zatiari: eraikuntza kolektiboaren faseari. Fase horretan, hainbat saio antolatuko dira, eta aurretik jasotako ekarpenetatik abiatuta, Erkiben kokatuko den proiektuaren oinarriak zehaztuko dira. Merkatuaren helburuak eta balioak definitzea, eskaini beharreko zerbitzuak zehaztea, antolaketa eredua adostea eta etorkizuneko lan ildoak finkatzea izango dira lantzeko gai nagusien artean.
Erkibe eraikineko lorategiko lanak amaitu dira jada. Espazio berria herritarrei zabaltzeko eta prozesuaren inguruko xehetasunak emateko ekitaldi irekia egingo du udalak ekainaren 3an, lorategian bertan, 18:30ean.
