Jexux Zelaia azpeitiarrak bi domina eskuratu ditu Espainiako Atletismo Federazioak (RFEA) antolatutako mendi lasterketen txapelketetan, Palentzia inguruan. 60 urtetik gorakoen kategorian, urrezko domina lortu zuen kilometro bertikaleko proban, Brañoson, eta zilarrezkoa mendi lasterketan, Aguilar de Campoon.
“"Ibilbidearen bukaera moztu zuten, ekaitzagatik, eta hiru lehenengoak sei segundoko tartean iritsi ginen helmugara, asko sufrituta."
Zelaiaren arabera, kilometro bertikaleko proba oso gogorra izan zen, ekaitz baten ondorioz ibilbidearen zati bat moztu behar izan baitzuten. Mendi lasterketan, berriz, zortzi kilometroko ibilbide gogorrari bi bira eman ondoren, irabazlearengandik minutu bat eta sei segundora helmugaratu zen, zilarra lortuz.
Xabat Manzisidor azpeitiarrak ere parte hartu zuen bi probetan, eta bietan podiumera igo zen 40 urtetik gorakoen kategorian. Brontzezko bi domina eskuratu zituen, bata kilometro bertikaleko proban eta bestea mendi lasterketan, Goierri Garaia taldea ordezkatuz.
