Azpeitiko Udalak hainbat ekintza antolatu ditu datozen egunetarako, Europako Mugikortasunaren Astearen barruan, oinezkoen zein bizikleten joan-etorriak sustatzeko. Horrez gain, Gipuzkoako Foru Aldundiak ere prestatu ditu ekintzak ostegunerako.
Herriko hainbat gunetan metrominutu panelak jarri dituzte. Panel hauek oinezkoen mugikortasuna sustatzeko mapak dira, eta herriko puntu nagusien arteko ibilbideen distantziak eta gutxi gorabeherako denborak zehazten dituzte. Ingurumen zinegotziek, Joanes Amenabar eta Mikel Odriozola, gogorarazi dute herri barruko joan-etorri asko oinez egin daitezkeela, autoaren ohitura izan arren. Panel hauen bidez, informazio praktikoa eskaini nahi diete herritarrei, mugikortasun jasangarriagoak aukeratzeko eta autoaren erabilera murrizteko.
Panelak Garmendiko kirol gunean, igerilekuaren aurrean, Betharramgo erakusketa aretoaren ondoan (Jose Artetxe kalea) eta Udaltzaingoaren eraikinaren ondoan (Plaza Txikia) ipini dituzte.
Gainera, bizikletaren erabilera segurua bultzatzeko bi jarduera antolatu ditu udalak iganderako, 17:30etik 19:30era bitartean. Batetik, 6 eta 14 urte bitarteko gazteei zuzendutako ginkana egingo da Bustinzuriko Errebalean, trebetasuna eta segurtasuna lantzeko. Bestetik, Olazko Amaren Plazan, bizikletak konpontzeko oinarrizko mekanika tailerra eskainiko da eguneroko arazoak konpontzeko. Arauntza Riders taldeak bideratuko ditu jarduera biak.
