Galdakao Gogora elkarteak irailaren 26an Miranda Ebrora (Burgos) kontzentrazio-zelara egiteko irteera antolatu du. Irteera 09:00etan hasiko da udaletxe ondotik eta autobusez egingo da. Elkarteak gogorarazi duenez, 1937-44 artean 65.000 preso egon ziren bertan, eta horien artean euskaldun asko ere izan ziren. Izena emateko epea irailaren 24ra arte egongo da zabalik, 667 488 691 telefono zenbakira deituta. Irteeraren prezioa 10 eurokoa izango da.
Bestalde, Galdakaoko jaietako ohiko ekitaldi bat, Zaku lasterketa, jokatu da. Aurten Güsak kuadrillak irabazi du, eta Antropayak, Trabukiak, Sukuzu eta Kamikatxe kuadrillek ere jaso dituzte puntu gehigarriak.
Irailaren 17an, ostegunean, Pako Revueltas galdakoztarraren Barsanti antzerki konpainiak ‘Kodizia Late Night’ kale-antzezlana eskainiko du. Tragikomedia honek diru-gosearen inguruko gaiak jorratzen ditu, historiaurreko pertsonaiaren istorioak kontatuz.
Jaietako beste une batzuk ere jaso dira, hala nola kuadrillen desfilea eta txupinazoa. Galdakaoko jaiak irailaren 20ra arte luzatuko dira jarduera ugari eskainiz.
