Negozioen eskualdatzeari dagokionez, kanpaina bateratu baten helburua da eskualdatze egoeran dauden eta errentagarriak diren negozio txikien itxiera saihestea. Informazioa leku estrategikoetan eta kanpainan parte hartzen duten erakundeen bulegoetan zabaltzea aurreikusi da.
Urola Benefit proposamenak langileek lanorduetan eskualdeko zerbitzuak erabiltzea sustatu nahi du. Aurkezpenean auto-tailerrak, fisioterapia edo nutrizio saioak, eta harategi edo elikadura eskaerak aipatu ziren. Ekimenaren helburua eskualdetik kanpoko talentua bertan mantentzea da, eta saiakera berezi bat egitea eskatu da gai honen inguruan.
Ekintzaileentzako laguntzari dagokionez, KLINK Bide programak estrategia eta finantzaketa, oinarrizko adimen artifiziala, marka-posizionamendua, bezeroarentzako arreta eta presentzia digitala lantzeko saioak eskainiko ditu datorren seihilekoan. KLINK Gune, berriz, ekintzaileen kezkak partekatzeko kafe-tertulia gisa planteatzen da, eta aurtengo bigarrena azaroaren 18an ospatuko da.
Azkenik, enplegu planari eta 2027ko lan-ildeei begira, Urola Erdiko diagnostiko sozioekonomikoa urte amaierarako esku artean izatea aurreikusten da. Bertan jasotakoak kontuan hartuko dira 2027ra begirako lan ildoak definitzerakoan.
