Martxa hau igandean hasi zen Gasteizen, eta laugarren etapa izango du Azpeitian amaituko dena. Bertatik, Urola Kosta igaro eta Donostiara joko dute etzi, eta ondoren, Ordiziatik eta Arrasatetik pasatuta, Gasteizera itzuliko dira igandean. Euskal Herri osoko 4.545 irakasle jubilatu inguru bildu ditu aldarrikapen honek.
Adostuz elkarteak salatu duenez, 2012az geroztik ez zaie ordaintzen lan hitzarmenean jasotako jubilazio aurreratuari dagokion kalte ordaina. Eusko Jaurlaritzak, Diru-Aurrekontuen Legea erabiliz, hitzarmenaren atal bat bertan behera utzi nahi duela adierazi dute. "Etenda dagoenez, baina, ez digute ordaindu nahi", adierazi dute, nahiz eta bi aldiz adostu den Eusko Legebiltzarrean ordainduko zaiela.
Gainera, Jaurlaritzak negoziazio kolektiboa bertan behera uzteko modua aurkitu duela eta horrek sindikatuen lana ziurgabetasunean utzi duela gaineratu dute. Adostuzekoen iritziz, Diru-Aurrekontuen Legea ezin da erabili lan hitzarmena baliogabetzeko, "negoziazio kolektiboa trufatzea" dela uste baitute.
Beste arlo batzuetan aurrejubilazioak sustatzeko kalte ordainak ordaintzen direla gogorarazi dute, aurrejubilazioak kalte ekonomikoa eragiten duelako. "Indemnizazioak lanpostua uzteagatik sortutako kalte ekonomikoak ordaintzeko dira", esan dute. Era berean, Jaurlaritzak "birmoldaketa isila" egin nahi duela salatu dute, aurrejubilazioei esker dirua aurreztu eta langile taldea berritzeko aukera izan duelako, eta horrek ikasgela kopurua gutxitu eta ikastetxeak batu dituela adierazi dute, itunpeko ikastetxeak indartuz.
